Нарында мөңгүлөрдү сактоо боюнча эл аралык жайкы мектеп ачылды
24-июнда Нарын шаарында “Мөңгүлөрдү изилдөө, сактоо жана климаттын өзгөрүшүнө ыңгайлашуу” аттуу эл аралык жайкы мектептин расмий ачылышы өттү. Бул тууралуу президенттин администрациясы билдирди.
Иш-чара Кыргызстандын тоо күн тартибин илгерилетүү, климаттын өзгөрүшүнө ыңгайлашуу жана мөңгүлөрдү сактоо багытындагы эл аралык кызматташтыкты кеңейтүү максатында уюштурулду. Окуу программасы 7-июлга чейин уланат.
Жайкы мектеп Тоо өнөктөштүгүнүн катчылыгы, Европадагы коопсуздук жана кызматташтык уюму, Борбордук Азия университети, БУУнун Азык-түлүк жана айыл чарба уюму жана башка өнөктөштөрдүн колдоосу менен өткөрүлүүдө.
Программа мөңгүлөрдү сактоо, климаттык коопсуздук жана тоо экосистемаларын туруктуу өнүктүрүү боюнча билим жана тажрыйба алмашууга багытталган. Анын алкагында лекциялар, практикалык сабактар жана талаа изилдөөлөрү камтылган.
Жайкы мектеп ишине Кыргызстан, Казакстан, Тажикстан, Түркмөнстан жана Өзбекстандан келген өкүлдөр катышууда. Лекторлор катары Бельгия, Италия, Швейцария, Норвегия, Германия, Австрия, Кыргызстан, Казакстан, Индиянын жана башка өлкөлөрдүн алдынкы адистери менен окумуштуулары чыгышууда.
