Алгачкы эки саатка 50 сом: унаа токтотуунун жаңы системасы сыноодон өтөт
Бишкектеги Жеңиш аянтынын аймагында жайгашкан муниципалдык унаа токтотуучу жайда сааттык төлөм системасы сыноо тартибинде ишке кирди. Бул тууралуу калаа мэриясы билдирди.
Сааттык төлөм системасы Шопоков көчөсүнүн чыгыш тарабында, "One Group" соода борбору менен Жеңиш аянтынын ортосунда жайгашкан 95 орундуу муниципалдык унаа токтотуучу жайда колдонулууда.
Сыноо мезгилинде алгачкы 15 мүнөт унааны токтотуу акысыз болот. Андан кийин биринчи эки саат үчүн 50 сом, ал эми кийинки ар бир саат үчүн 10 сомдон төлөм алынат.
Ал эми сыноо мезгили аяктагандан кийин жаңы тутумдун натыйжалуулугу талданып, муниципалдык унаа токтотуучу жайларды мындан ары өнүктүрүү боюнча сунуштар иштелип чыгат.
"Шаардык жол-транспорттук инфратүзүм" муниципалдык ишканасы айдоочуларды унаа токтотуучу жайларды пайдалануунун белгиленген эрежелерин сактоого чакырды.
