Кара-Балтада 4 млн долларга заманбап таштанды талаасы курулат
Кара-Балта шаарында жаңы санитардык катуу тиричилик калдыктарын төгүүчү таштанды талаасын куруу маселеси боюнча жумушчу кеңешме өттү. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Маалыматка ылайык, иш-чарага министрдин биринчи орун басары Жеңиш Сейдалиев, жергиликтүү бийлик органдарынын, Коомчулукту өнүктүрүү жана инвестициялоо агенттигинин, Кара-Балта тоо-кен комбинатынын, Талды-Булак айыл өкмөтүнүн өкүлдөрү жана башка кызыкдар тараптар катышты.
Жалпы наркы 4 млн долларды түзгөн долбоор Жапониянын гранттык колдоосу менен ишке ашырылууда. Долбоордун алкагында "Фукуока" технологиясынын негизинде заманбап экологиялык жана санитардык талаптарга жооп берген пилоттук полигон куруу каралууда.
Жеңиш Сейдалиев Кара-Балта шаары үчүн заманбап таштанды талаасынын курулушу экологиялык абалды жакшыртуу жана калктын жашоо сапатын жогорулатуу багытындагы маанилүү кадам болорун белгиледи.
