Кырчын жайлоосунда жайытты тебелегендер 33 миң сом айып пул төлөдү
Ысык-Көл облусунун Кырчын жайлоосунда жарандар унаалары менен өсүмдүктөрдү тебелеп, жер кыртышына зыян келтирген фактылар аныкталды. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Маалыматка ылайык, Экологиялык жана техникалык көзөмөл кызматы жүргүзгөн рейддик иш-чарада мыйзам бузуу учурлары катталып, 6 жаранга протокол түзүлдү. Аларга жалпы 33 миң сом өлчөмүндө айып пул салынды.
Учурда текшерүү иштери өлкөнүн бардык аймактарында улантылып жатат. Мыйзамга ылайык, жайыттарды мыйзамсыз тебелөө жана бузуу фактылары үчүн жоопкерчилик каралган. Министрлик эреже бузгандарга 5 500 сомдон 20 000 сомго чейин айып пул салынарын эскертти.
