Нарын коругундагы көчөтканада 6 миңге жакын көчөт өстүрүлүүдө
Нарын мамлекеттик жаратылыш коругунда уюшулган өсүмдүк көчөтканасына 2026-жылы апрелде 6 миңге жакын карагай, көк карагай, арча, кайың, терек жана башка дарактардын көчөтү отургузулган.
Жаратылыш ресурстары, экология жана техникалык көзөмөл министрлиги билдиргендей, көчөткананын ишмердүүлүгү менен министр Акыл Токтобаев жеринен таанышты.
Иш сапарынын жүрүшүндө министрге көчөткананын базасы толугу менен оңдолуп, керектүү техникалар жана шаймандар менен камсыздалганы, ошондой эле материалдык-техникалык базасы чыңдалганы тууралуу маалымат берилди.
Акыл Токтобаев адистерге көчөттөрдү атайын жабык идиштерге өстүрүүгө көңүл бурууну сунуштады. Анын айтымында, мындай ыкма көчөттөрдүн жерсинип кетүү деңгээлин жогорулатып, жоготууларды азайтат жана токойлорду калыбына келтирүү иштеринин натыйжалуулугун арттырат.
Мындан тышкары, министр бугу-марал багуучу жайда коруктун кызматкерлери менен биргеликте илимий изилдөөлөрдү жүргүзүп жаткан Кыргыз-Түрк "Манас" университетинин окумуштуулары менен көрүштү. Жолугушууда илимий иштердин жүрүшү жана жапайы жаныбарларды сактоо багытындагы изилдөөлөр талкууланды.
