Кооперативдер 185 млн сомдук бизнес-пландарды түзүштү
26-июнда Бишкекте БУУнун Азык-түлүк жана айыл чарба уюмунун Суу ресурстары, айыл чарба жана кайра иштетүү өнөр жайы министрлиги менен биргеликте ишке ашырган долбоорунун жыйынтыктоочу семинары өттү.
Уюмдун маалыматына ылайык, долбоордун негизги максаты фермерлерге жана кооперативдерге инвестиция тартуу жана бизнес жүргүзүүгө көмөктөшүү болуп саналат.
Иш-чаранын алкагында болжол менен 100 адам, анын ичинде кооперативдердин өкүлдөрү жана Фермерлерди тейлөө борборлорунун кызматкерлери "RuralInvest" куралын колдонуу аркылуу бизнес-пландарды түзүүнү үйрөнүштү.
Долбоордун жыйынтыгында кооперативдер менен биргеликте жалпы суммасы 184 млн 840 миң сомду түзгөн 9 бизнес-план иштелип чыкты. Алардын ичинен "Саруу орток" жана "Барскооп" кооперативдери Ислам өнүктүрүү банкы менен 77,14 млн сомдук насыя келишимдерине кол коюшкан.
Ошондой эле жер-жерлердеги адистер үчүн колдонмо китептер даярдалып, фермерлердин бизнесин өнүктүрүүгө көмөк көрсөтө турган сунуштар берилди.
БУУнун Азык-түлүк жана айыл чарба уюмунун Кыргызстандагы өкүлү Олег Гучгельдыев белгилегендей, айыл чарба өлкөнүн экономикасы жана азык-түлүк коопсуздугунун негизги таянычы болуп саналат. Анын айтымында, фермерлерге субсидиядан тышкары каржы уюмдары менен бир тилде сүйлөшө алган көндүмдөр зарыл.
Уюм долбоордун жыйынтыгы менен иш токтоп калбай турганын, айыл аймактарындагы адистерди колдоо жана окутуу улантыларын билдирди.
