Орусияда Кыргызстандын Башкы прокуратурасынын өкүлчүлүгүн ачуу маселеси каралды
Кыргызстандын башкы прокурору Максат Асаналиев Орусияда өткөн Санкт-Петербург XIV эл аралык юридикалык форумуна катышты. Бул тууралуу Кыргызстандын Башкы прокуратурасы билдирди.
Маалыматка ылайык, форум — укуктук жөнгө салууну өркүндөтүү, эл аралык кызматташтыкты өнүктүрүү жана мыйзам үстөмдүгүн чыңдоо маселелерин талкуулоого багытталган ири эл аралык аянтча.
Иш-чаранын алкагында Максат Асаналиев Орусиянын башкы прокурору Александр Гуцан, юстиция министри Константин Чуйченко жана Беларустун Тергөө комитетинин төрагасы Константин Бычек менен эки тараптуу жолугушууларды өткөрдү.
Жолугушууларда укук коргоо жаатындагы кызматташтыкты өнүктүрүү, соттолгондорду өз өлкөсүндө жазасын өтөөсү үчүн өткөрүп берүү, кылмыш иштери боюнча өз ара укуктук жардам көрсөтүү маселелери талкууланды.
Ошондой эле Кыргызстандын Башкы прокуратурасынын Орусиядагы өкүлчүлүгүн ачуу демилгеси каралып, бул кадам эки өлкөнүн ортосундагы укуктук кызматташуунун натыйжалуулугун жогорулатары белгиленди.
Тараптар жыйынтыгында стратегиялык өнөктөштүктү чыңдоого жана кызматташууну кеңейтүүгө кызыкдар экенин ырасташты.
