Саясий чөйрөдө аялдардын өкүлчүлүгү 40%га жетти
Бишкекте Шанхай кызматташтык уюмунун "Аялдардын лидерлиги" темасындагы Аялдар форуму өз ишин баштады. Иш-чара Кыргызстандын 2026-жылдагы ШКУга төрагалыгынын алкагында 26–27-июнда "Эне-Сай" мамлекеттик резиденциясында өтүүдө.
Эмгек, социалдык камсыздоо жана миграция министрлиги билдиргендей, форумга Шанхай кызматташтык уюмуна мүчө мамлекеттердин бийлик өкүлдөрү, эл аралык уюмдар, жарандык коом, адистер, ишкер айымдар жана аялдар кыймылынын жетекчилери катышууда.
Негизги талкуу аялдардын коомдук-саясий жана экономикалык турмуштагы ролун кеңейтүү, гендердик теңчилик жана туруктуу өнүгүүгө катышуусун күчөтүү маселелерине арналган.
Программа үч сессияны камтыйт: "Аялдардын лидерлиги: саясий жана коомдук чечимдерди кабыл алууда аялдардын ролу", "Экономикалык өнүгүүдөгү аялдардын ролу" жана аялдардын укуктарын жана мүмкүнчүлүктөрүн кеңейтүү маселелерине арналган панелдик талкуу.
Эмгек, социалдык камсыздоо жана миграция министринин орун басары Аида Исатбек кызынын айтымында, өлкөдө аялдардын мамлекеттик чечим кабыл алуудагы өкүлчүлүгү өсүп жатат. Жогорку Кеңеште аялдар 33,4%ды, ал эми жергиликтүү кеңештерде 40%ды түздү.
Ал Кыргызстанда аялдардын чечим кабыл алууга катышуусун кеңейтүүгө багытталган квоталар жана башка механизмдер ишке ашырылып жатканын белгиледи.
