Түптө 180 батирлүү ипотекалык турак жайдын курулушу башталды
Ысык-Көл облусунун Түп районунун Кең-Суу айылында "Хан-Теңири-6" ипотекалык турак жай комплексинин курулушу башталды. Бул тууралуу президенттин Иш башкармалыгы билдирди.
Маалыматка ылайык, 3 алты кабаттуу турак үй курулуп, жалпысынан 180 батир пайдаланууга берилет. Анын ичинде 42 бир бөлмөлүү, 102 эки бөлмөлүү жана 36 үч бөлмөлүү батир каралган.
Турак жай комплекси 1,65 гектар аянтта жайгашып, жашоочулар үчүн бардык зарыл шарттар түзүлөт. Долбоорго ылайык, аймакта балдар аянтчасы, кичи футбол аянтчасы, теннис талаасы, эс алуу жайлары, сейилдөө жолдору, жашылдандырылган аймактар, ички жолдор жана 220 орундуу унаа токтотуучу жай курулат.
Президенттин иш башкармалыгынын жетекчиси Каныбек Туманбаев калкты турак жай менен камсыздоо мамлекеттин артыкчылыктуу багыттарынын бири экенин белгиледи.
