Кыргызстанда 246 миңден ашык чарба жүргүзүүчү субъектти аялдар жетектейт
Экономика жана коммерция министринин орун басары Беназир Нурланова Шанхай кызматташтык уюмуна мүчө өлкөлөрдүн Аялдар форумунда өлкө экономикасындагы чакан жана орто бизнестин ордун белгиледи.
Анын айтымында, бүгүнкү күндө чакан жана орто бизнес Кыргызстандын ички дүң жыйымынын 51,7%ын түзөт. Ошондой эле 823 миңден ашык чарба жүргүзүүчү субъекттин 246 миңден ашыгын аялдар жетектейт.
Беназир Нурланова "Аялдардын экономикалык өнүгүүдөгү ролу" аттуу панелдик сессияда айымдардын ишкерлигин колдоо мамлекеттик саясаттын артыкчылыктуу багыттарынын бири экенин айтты. Өлкөдө бизнес жүргүзүү шарттарын жакшыртуу жана каржылоо боюнча реформалар ишке ашырылып жатканын кошумчалады.
Ошондой эле аялдардын экономикалык мүмкүнчүлүктөрүн кеңейтүү туруктуу экономикалык өсүштү камсыздоонун жана өлкөнүн атаандаштыкка жөндөмдүүлүгүн жогорулатуунун негизги шарты экенин белгиледи.
