Министр Балыкчы–Жалал-Абад жолунун курулуш иштерин көзөмөлдөдү
Транспорт жана коммуникациялар министри Талантбек Солтобаев Балыкчы–Жалал-Абад унаа жолунда жүрүп жаткан курулуш иштеринин көзөмөлдөдү. Бул тууралуу министрликтин басма сөз кызматы билдирди.
Иш сапарынын алкагында министр кооптуу тилкелерде курулуп жаткан тирөөч дубалдардын, селден жана тоо көчкүлөрүнөн коргоочу галереялардын, ошондой эле үч жерде салынып жаткан жол тейлөө пункттарынын курулушунун жүрүшүн текшерди.
Текшерүүнүн жыйынтыгында тиешелүү жактарга курулуш иштерин белгиленген мөөнөттө жана сапаттуу бүтүрүү, техникалык талаптарды так сактоо, жол кыймылынын коопсуздугун камсыздоо жана аткарылып жаткан иштерге көзөмөлдү күчөтүү боюнча тапшырмалар берилди.
Талантбек Солтобаев ошондой эле жол кыймылынын коопсуздугун камсыздоо, курулуш иштеринин сапатын жогорулатуу министрликтин артыкчылыктуу багыттарынын бири экенин белгиледи.
