Ошто тез жардам борборунун жаңы имараты курула баштады
Курулуш, архитектура жана турак жай-коммуналдык чарба министри Нурдан Орунтаев жана Ош шаарынын мэри Жанар Акаев 94 жыл мурда курулган тез жардам борборунун имаратындагы курулуш иштеринин жүрүшү менен таанышты.
Курулуш министрлиги билдиргендей, жаңы тез жардам борбору бардык заманбап талаптарга жооп берген эки кабаттуу имарат болот. Анда медициналык кызматкерлер үчүн ыңгайлуу эмгек шарттары, диспетчердик борбор, эс алуу жана тейлөө бөлмөлөрү, ошондой эле тез жардам унаалары үчүн жабык унаа токтотуучу жай жана атайын техникалык аймактар каралган.
Белгилей кетсек, эки ай мурун президент Садыр Жапаров Ош шаарынын калкы менен жолукканда оорукананын кызматкери 1932-жылы курулган тез жардам борбору эскирип калганын айтып, жаңы имарат куруу өтүнүчүн билдирген.
Маалыматка ылайык, мамлекет башчысынын тапшырмасынын негизинде маселе ыкчам чечилип, учурда эски имарат буздурула баштады. Жаңы борбор президенттин Турукташтыруу фондунан бөлүнгөн каражаттын эсебинен курулууда.
