Чектеш өлкөлөр атайын жөнөтүүлөрдү алмашуу маселесин талкуулашты
Ички иштер министрлигинде чектеш мамлекеттер ортосунда атайын жөнөтүүлөрдү чек ара аркылуу алмашууну уюштуруу жана өркүндөтүү маселелерине арналган жумушчу жолугушуу болуп өттү. Бул тууралуу министрликтин басма сөз кызматы билдирди.
Иш-чарага ички иштер министринин орун басары Сүйүнбек Ниязбеков, Фельдъегердик кызматынын жана «Фельдъегердик кызматтын Атайын байланыш кызматы» мамлекеттик ишканасынын жетекчилиги, ошондой эле Казакстан жана Тажикстандын өкүлдөрү катышты.
Сүйүнбек Ниязбеков атайын байланыш тармагындагы эл аралык кызматташтыкты өнүктүрүү мамлекеттер аралык өз ара аракеттенүүнү чыңдоодо маанилүү экенин белгиледи. Ал мамлекеттик органдардын натыйжалуу иштеши үчүн атайын жөнөтүүлөрдү ишенимдүү, ыкчам жана коопсуз алмашууну камсыздоо өзгөчө мааниге ээ экенин айтты.
Жыйындын жүрүшүндө катышуучулар атайын жөнөтүүлөрдү чек ара аркылуу алмашуунун учурдагы тартибин, маселелерди жана кызматташтык механизмдерин өркүндөтүү жолдорун талкуулашты. Ошондой эле тажрыйба алмашуу, заманбап уюштуруучулук жана технологиялык чечимдерди колдонуу өз ара кызматташуунун натыйжалуулугун жогорулатары белгиленди.
Жолугушуунун соңунда тараптар Кыргызстан, Казакстан жана Тажикстандын ортосундагы өнөктөштүктү мындан ары чыңдоого, өз ара пайдалуу кызматташууну кеңейтүүгө жана атайын жөнөтүүлөрдү чек ара аркылуу алмашуу системасын өркүндөтүүгө кызыкдар экенин ырасташты.
