Чүйдөгү үрөндүк аянттардын абалына баа берилет
Чүй облусунун үрөнчүлүк чарбаларында айыл чарба өсүмдүктөрүнүн сапатын баалоо иштери жүргүзүлүп жатат. Бул тууралуу Суу ресурстары, айыл чарба жана кайра иштетүү өнөр жайы министрлигинин басма сөз кызматы билдирди.
Текшерүү иштерин Айыл чарба өсүмдүктөрүн жана багбанчылыкты экспертизалоо департаментинин адистери жүргүзүп, үрөнчүлүк чарбалардын ишмердүүлүгү жана мамлекеттик талаптардын сакталышы көзөмөлгө алынууда.
Учурда Чүй районундагы "Он-Бир Жылга" үрөнчүлүк чарбасында жаздык арпанын үрөндүк аянттарына текшерилип жатат. Иш-чара үрөнчүлүк тармагындагы белгиленген талаптарга ылайык уюштурулуп, сапаттуу үрөн өндүрүүнү камсыздоого багытталган.
Адистер сорттук белгилердин сакталышына, башка сорттордун жана аралашмалардын жоктугуна, өсүмдүктөрдүн өсүү абалына, оорулар менен зыянкечтердин жайылышына жана отоо чөптөрдүн деңгээлине өзгөчө көңүл бурушууда.
Текшерүүнүн жыйынтыгында үрөндүк аянттарга баа берилип, чарбанын талаптарга ылайыктуулугу аныкталат. Ошондой эле кемчиликтерди жоюу боюнча сунуштар берилет.
