Кыргызстан маяна боюнча дүйнөлүк рейтингде 132-орунду ээледи
Кыргызстан орточо айлык акынын көлөмү боюнча дүйнөлүк рейтингде 132-орунга жайгашты. Бул тууралуу CEOWORLD журналынын 2025-жылдын жыйынтыгы боюнча жарыяланган изилдөөсүндө айтылат.
Рейтингге дүйнөнүн 200 мамлекети киргизилип, ал кызматкерлердин орточо таза айлык кирешесинин негизинде түзүлгөн. Ага ылайык, Кыргызстандагы орточо айлык акы айына болжол менен 335 долларды түзөт.
КМШ өлкөлөрүнүн арасында эң жогорку орунду Орусия ээлеп, 32-орунга жайгашкан. Анда орточо айлык акы 2 миң 266 доллар деп көрсөтүлгөн. Казакстан 77-орунда (780 доллар), Түркмөнстан 80-орунда (761 доллар), Беларусь 83-орунда (728 доллар), Армения 89-орунда (648 доллар), Грузия 90-орунда (641 доллар), Өзбекстан 117-орунда (458 доллар), Кыргызстан 132-орунда (335 доллар), ал эми Тажикстан 138-орунда (276 доллар) орун алган.
Дүйнөдө эң жогорку орточо айлык акы Швейцарияда катталган. Бул өлкөдө кызматкерлердин орточо айлык кирешеси 8 миң 218 долларды түзөт. Андан кийинки орундарда Люксембург (6 миң 740 доллар), АКШ (6 миң 562 доллар), Исландия (6 миң 548 доллар) жана Норвегия (5 миң 772 доллар) жайгашкан.
Ал эми эң төмөнкү орточо айлык акы Палестинада (104 доллар), Лесотодо (131 доллар), Анголада (134 доллар), Малавиде (138 доллар) жана Малиде (141 доллар) катталган.
Адистердин айтымында, айлык акынын деңгээлине өлкөнүн экономикалык мүмкүнчүлүктөрүнөн тышкары баалардын өсүшү, жашоо наркы, эмгек базарынын абалы жана жумуштуулуктун түзүмү да олуттуу таасир этет. Жогорку киреше көбүнчө каржы, IT, энергетика, өнөр жай жана билим берүү тармактарында байкалат.
