Кыргызстан менен ЮНИСЕФ социалдык кызматтарды жакшыртууга көңүл бурат
Министрлер кабинетинин төрагасынын орун басары Улан Маматканов Бириккен Улуттар Уюмунун Балдар фондунун Кыргызстандагы өкүлү Самман Джунг Тапа менен жолугушту.
Жолугушууда Улан Маматканов ЮНИСЕФтин Кыргызстандагы өкүлчүлүгү социалдык саясат, балдардын укуктарын жана кызыкчылыктарын коргоо багытында ишке ашырып жаткан долбоорлорго жогору баа берди.
Ал өлкөдө үй-бүлөнү колдоо, зомбулуктун алдын алуу, социалдык кызматтарды өнүктүрүү жана инклюзивдүү билим берүүнү кеңейтүү боюнча мамлекеттик программалар ишке ашырылып жатканын айтты.
Тараптар ошондой эле эмгек миграциясынын кесепеттери, майыптыгы бар балдар үчүн кызматтардын жеткиликтүүлүгү, зомбулук жана балдар эмгеги сыяктуу орчундуу маселелерди талкуулап, бул багыттардагы кызматташууну күчөтүү боюнча пикир алышты.
Жолугушуунун жыйынтыгында тараптар балдардын укуктарын жана жыргалчылыгын коргоо боюнча туруктуу натыйжаларга жетишүү үчүн Кыргызстандын социалдык кызматтарын дагы чыңдоого биргелешип көмөктөшүүгө макулдашышты.
