Манас шаарында курулуп жаткан мектептер текшерилди
28-июнда Курулуш, архитектура жана турак жай-коммуналдык чарба министри Нурдан Орунтаев Жалал-Абад облусуна болгон иш сапарынын алкагында Манас шаарында курулуп жаткан жаңы мектептердин курулуш иштеринин жүрүшүн текшерди.
Курулуш министрлигинин маалыматына ылайык, министр курулуштун сапатына, колдонулуп жаткан курулуш материалдарына жана иштердин жүрүшүнө баа берип, курулуш темпин күчөтүү жана объектилерди белгиленген мөөнөттө сапаттуу бүткөрүү боюнча подрядчы уюмдарга эскертүүлөрдү берди.
Белгилей кетсек, президент Садыр Жапаровдун тапшырмасына ылайык, 2026-жылы Манас шаарында республикалык бюджеттин эсебинен жалпы 6 жаңы мектеп курулууда.
Алар:
Көк-Арт аймактык башкармалыгынын Ак-Тилек жаңы конушундагы 375 орундуу мектеп;
Курманбек аймактык башкармалыгы, 750 орундуу мектеп;
Т. Тайгараев аймактык башкармалыгы, Чолок-Терек айылы, Т. Идирисова атындагы 375 орундуу мектеп;
Спутник аймактык башкармалыгы, 530 орундуу мектеп;
Достук аймактык башкармалыгы, Б. Осмонов атындагы 375 орундуу мектеп;
Достук аймактык башкармалыгы, Ж. Болотова атындагы 375 орундуу мектеп.
Аталган мектептер Курулуш министрлиги тарабынан ишке ашырылууда.
