Бишкекте жаш жубайлар үйлөнүү тоюнун урматына көчөт отургуза алышат
"Бишкек жашыл чарба" муниципалдык ишканасы "GREEN AIR" компаниясы менен биргеликте "Жаңы үйлөнгөндөргө бак отургузуу" аттуу экологиялык долбоорду баштады. Бул тууралуу Бишкек шаарынын мэриясынан билдиришти.
Долбоор жаңы үйлөнгөн жубайларга үйлөнүү тоюнан кийин өз үй-бүлөсүнүн символу катары бак отургузууга мүмкүнчүлүк берет. Уюштуруучулардын маалыматына ылайык, бул демилге үй-бүлөлүк салтты бекемдөө менен катар борбор калаанын жашыл аймактарын кеңейтүүгө багытталган.
Маалыматка ылайык, жаш жубайлар үйлөнүү тою болгон күнү же андан кийин белгиленген мөөнөттө шаардын коомдук жашыл аймактарынын бирине бак отургуза алышат. Ар бир отургузулган көчөт жашылдандырууга кошулган салым болуп саналат.
Долбоорго катышуу үчүн жубайлар тандалган күнгө кеминде эки жума калганда Бишкек мэриясынын расмий сайты же 0880005123 номуру аркылуу катталууга тийиш. Катталуу учурунда бак отургузула турган күн, убакыт жана район тандалат. Андан соң кызмат акысы QR-код аркылуу төлөнөт.
Уюштуруучулар ошондой эле бул кызматты жакындарынын үйлөнүү тоюна белек катары тартуулоого мүмкүнчүлүк түзүшкөн. Долбоордун алкагында арыз берген алгачкы беш жубайга көчөттөр акысыз берилери да кабарланды.
Катышуу баасы көчөттүн түрүнө жана мезгилге жараша аныкталат. Тактап айтканда, тамыры жабык көчөттөрдү отургузуу 10-апрелден 25-октябрга чейин 15 500 сомду түзөт, ал эми жаз жана күз мезгилдеринде тамыры ачык көчөттөрдү отургузуу 7 800 сом турат.
Отургузуу үчүн четин, кайың, жөкө жана башка дарактардын түрлөрү колдонулат. Тандалган аймактын шарттарына жараша дарактын так түрү адистер тарабынан аныкталат. Отургузулган бактар кийин муниципалдык кызматтардын көзөмөлүндө жана туруктуу багуусунда болот.
