1 млн доллардан ашык акчаны алдап алып, качып жүргөндөр издөөгө алынды
ИИМдин тергөө кызматы тарабынан Antares Trade каржы пирамидасын уюштуруу жана анын мыйзамсыз ишмердүүлүгү боюнча кылмыш иши ар тараптуу, толук жана объективдүү иликтенген. Бул тууралуу ИИМдин басма сөз кызматы билдирди.
Маалыматка ылайык, тергөө учурунда аныкталгандай, 2020-жылдын октябрь айынан 2021-жылдын июль айына чейинки мезгилде чет мамлекеттин жарандары С.Т., Д.М., Ч.Х., ошондой эле Кыргызстандын жараны Т.Т. алдын ала сүйлөшүп алып, Кыргызстандын аймагында каржы пирамидасынын белгилерине негизделген инвестициялык схеманы уюштурушкан.
Жарандарды аталган схемага тартуу максатында шектүүлөр Бишкек шаарындагы соода борборлорунун биринде компаниянын кеңсесин ачышып, үзгүлтүксүз презентацияларды жана жолугушууларды өткөрүшкөн. Анда жарандарга жогорку киреше, дивиденддердин кепилденген төлөмү жана салынган каражаттарды кыска мөөнөттө кайтарып алуу мүмкүнчүлүгү убада кылынган.
Ошол эле учурда, Antares Trade компаниясы юстиция органдарында каттоодон өтпөгөнү, мыйзамдуу юридикалык макамга ээ болбогону жана өлкө аймагында реалдуу инвестициялык же ишкердик ишмердүүлүк жүргүзбөгөнү аныкталган.
Тергөө иштеринин жүрүшүндө жарандардын акча каражаттарын мыйзамсыз тартууга байланыштуу 50 эпизод бир өндүрүшкө бириктирилген. Жабырлануучуларга келтирилген жалпы материалдык зыяндын өлчөмү 1 061 198 долларды түзгөн.
Кылмыш иши боюнча олуттуу тергөө аракеттери жүргүзүлүп, жетиштүү далилдер топтолгон. Анын негизинде 2021-жылдын декабрь айында тергөө аяктап, кылмыш иши маңызы боюнча кароо үчүн сотко жөнөтүлгөн.
Соттук кароонун жүрүшүндө С.Т., Д.М., Ч.Х. жана Т.Т. сот отурумдарына келбей, соттон жашырынып кетишкен. Ушуга байланыштуу аларга издөө жарыяланып, учурда издөө иш-чаралары улантылууда.
Ички иштер министрлиги издөөдө жүргөн адамдардын жүргөн жерин аныктоо жана алардын сотко келишин камсыз кылуу боюнча мыйзамда каралган бардык чараларды көрүүнү улантууда.
