Бааларга байкоо: кайсы азыктар кымбаттап, кайсылары арзандады?

Кыргызстанда сабиздин баасы 7%га, пастерленген сүт 2,1%га , кой эти 1,3%га, тандыр нан 0,4%га, ошондой эле айрым макарон азыктары 0,2%га кымбаттады. Бул тууралуу Суу ресурстары, айыл чарба жана кайра иштетүү өнөр жайы министрлиги билдирди.

Маалыматка ылайык, аталган министрлик Кыргызстан, Казакстан жана Орусиядагы негизги азык-түлүктөрдүн бааларына салыштырма мониторинг жүргүзгөн.

Жыйынтыгында учурда пияз –6,9%га, картөшкө –4,6%га, каймак май –0,9%га, күн карама майы –0,6%га, биринчи сорттогу импорттук ун жана андан жасалган нан –0,5%–0,6%га, күрүч –0,1%га арзандаганы белгиленди.

Казакстанда картошка, баш пияз, биринчи сорттогу ун, күн карама майы жана сабиздин баасы кымбаттаганы, ал эми күрүч, жумуртка, нан, уй эти, кумшекер жана сүт арзандаганы байкалган.

Орусияда болсо пияз, картөшкө, сабиз, кумшекер, вермишель жана уй этинин баасы өссө, жумуртка, кой эти, каймак май, биринчи сорттогу ун, пастерленген сүт жана күн карама майы төмөндөгөнү аныкталган.