Баткендин аймагында жазгы санакта 4 миңден ашык суур катталды
Баткен облусунда суурлардын жазгы санагы ийгиликтүү аяктап, жалпы 4 146 даана суур катталды. Бул тууралуу Жаратылыш ресурстары, экология жана техникалык көзөмөл министрлиги билдирди.
Маалыматка ылайык, министрликтин Баткен регионалдык башкармалыгынын Өзгөчө корголуучу жаратылыш аймактары жана биотүрдүүлүк бөлүмүнүн адистери тарабынан жүргүзүлгөн санак жапайы жаныбарлардын санын, таралышын жана популяциясынын абалын аныктоо максатында өткөрүлдү.
Санактын жыйынтыгында Баткен облусунун 188 512,2 гектар аянтында 759 даана суур эсепке алынса, "Сурма-Таш" мамлекеттик жаратылыш коругунун 66 194,4 гектар аймагында 3 387 даана суур катталган.
Адистердин белгилешинче, мындай байкоо иштери жаныбарлар дүйнөсүнүн абалына туруктуу көз салууга жана аймактын биотүрдүүлүгүн сактоо боюнча иш-чараларды натыйжалуулугун арттырууга өбөлгө түзөт.
Министрлик өлкөнүн фаунасын коргоо, жапайы жаныбарлардын табигый жашоо чөйрөсүн сактоо жана алардын санын көзөмөлдөө боюнча иштер мындан ары да улантыларын маалымдады.
