Ош шаарында эл аралык мотожүрүш өтөт
30-июлда Ош шаарындагы борбордук аянтта "Көчмөн жолу" аттуу эл аралык мотожүрүш өтөт. Иш-чаранын салтанатуу ачылышы саат 15:30да башталат.
Ош шаардык мэриясынын маалыматына ылайык, мотожүрүш VI Дүйнөлүк көчмөндөр оюндарына арналып уюштурулууда.
Ага Кыргызстан, Өзбекстан, Казакстан, Тажикстан жана Орусиядан келген 150гө жакын адам катышат. Алар өз өлкөлөрүнүн топторун тааныштырып, коопсуз жана жоопкерчиликтүү айдоо маданиятын жайылтууга салым кошушат.
Белгиленгендей, иш-чара шаардык бийликтин жана мотоцикл клубдарынын колдоосу менен уюштурулуп, мото-туризмди өнүктүрүү жана жол кыймылынын коопсуздугун жогорулатуу максатын көздөйт.
