Агроөнөр жай тармагына 8 млрд сомдон ашык жеңилдетилген насыя берилди
Жалпы көлөмү 12 млрд 985,7 млн сомду түзгөн 8 жеңилдетилген каржылоо долбоорунун алкагында акыркы 6 айда 8 млрд 163,6 млн сомдон ашык каражат айыл чарба өндүрүүчүлөрүнө берилди. Бул тууралуу Суу ресурстары, айыл чарба жана кайра иштетүү өнөр жайы министрлигинин басма сөз кызматы билдирди.
Каржылоо "Айыл чарбасын каржылоо – 14", "Агроөнөр жай комплексине насыя берүү", "Бириккен товар өндүрүүчүлөрдү каржылоо", асыл тукум мал чарбасын өнүктүрүү, үрөнчүлүк чарбаларды колдоо, суу үнөмдөөчү сугат тутумдарын каржылоо сыяктуу багыттар аркылуу ишке ашырылууда.
Негизги банктар катары Элдик Банк жана АБанк катышып, фермерлерге арзан насыяларды сунуштоодо.
Долбоорлордун алкагында айыл чарба техникасы лизинг аркылуу берилип, мал чарба, үрөнчүлүк жана сугат системаларын өнүктүрүү багытында да иштер жүрүүдө. Тактай кетсек, лизинг — бул мүлктү узак мөөнөткө ижарага алып колдонуп, акырында сатып алуу мүмкүнчүлүгү бар каржылоо түрү.
Министрлик мындай каржылоолор өлкөнүн агрардык тармагын колдоого жана өндүрүштү кеңейтүүгө багытталганын белгиледи.
