Караколдогу саркынды сууларды тазалоочу объекттин курулушу 90%га аяктады
Каракол шаарында жаңы канализациялык тазалоочу курулмалар 90%га курулуп бүттү. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Объекттин долбоордук кубаттуулугу суткасына 12 миң куб метрди түзөт. Бул шаардагы саркынды сууларды тазалоону камсыз кылып, Ысык-Көл көлүнүн биосфералык аймагын коргоого багытталган.
Жаңы тазалоочу курулмаларда саркынды сууларды тазалоонун көп баскычтуу системасы ишке киргизилүүдө. Анын алкагында механикалык тазалоо, биологиялык тазалоо («A2O» технологиясы), автоматташтырылган башкаруу системасы (SCADA) жана акыркы этапта зыянсыздандыруу иштери каралган.
Долбоор экологиялык коопсуздукту камсыз кылууга жана заманбап технологияларды колдонуу менен саркынды сууларды тазалоонун натыйжалуулугун жогорулатууга багытталганы белгиленди.
