Кыргызстан менен Корея токойлорду калыбына келтирүү боюнча кызматташат
Өзгөчө кырдаалдар министрлигине караштуу Токой кызматынын делегациясы Кореяда иш сапар менен болуп, эки тараптуу жолугушууларды өткөрдү.
Токой кызматы билдиргендей, делегацияны Өзгөчө кырдаалдар министринин орун басары Нурбек Жумалиев жетектеди.
Иш-чаранын жүрүшүндө Кореянын Токой кызматынын министри Пак Ын Сик баштаган расмий өкүлдөр менен жолугушуу болуп өттү. Анда эки өлкө ортосунда токой тармагындагы кызматташтыкты кеңейтүү маселелери талкууланды.
Жолугушуунун негизги максаты — токойлорду калыбына келтирүү, токой ресурстарын туруктуу башкаруу жаатындагы тажрыйба алмашууну күчөтүү жана климаттын өзгөрүшүнө каршы биргелешкен аракеттерди көрүү.
Ошондой эле тараптар экологиялык туруктуулукту камсыз кылуу багытында эл аралык өнөктөштүктү чыңдоого кызыкдар экенин билдиришти.
Жолугушуунун жыйынтыгында эки өлкө токой чарбасы жана экологиялык коопсуздук багытында кызматташтыкты мындан ары да тереңдетүүгө даяр экенин тастыкташты.
