Манастагы “Акылман” мектеп-лицейинин курулушу 75%га аяктады
Курулуш, архитектура жана турак жай-коммуналдык чарба министри Нурдан Орунтаев Манас шаарындагы “Акылман” президенттик мектеп-лицейинин курулуш иштерин текшерди.
Министрликтен билдиришкендей, буга чейин мектептин жалпы сметалык наркы 2,1 млрд сомдон ашык болуп, курулуштун 1 чарчы метринин баасы 1 103 долларды түзгөн. Министрлик кайра эсептеп чыгып, 1 чарчы метрдин баасы 750 долларга чейин төмөндөп, жалпы сметалык наркы 1,7 миллиард сом болуп бекитилген.
Учурда курулуш иштерин Кыргызкурулуш мамлекеттик ишканасы жүргүзүп, долбоор республикалык казынадан каржыланууда.
Жалпы аянты 2,4 гектарды түзгөн мектеп-лицей үч кабаттуу окуу корпусун, 360 окуучуга ылайыкталган билим берүү имаратын, 410 орундуу жатакананы жана мугалимдер үчүн 25 батирлүү беш кабаттуу турак жайды камтыйт. Долбоордо 34 окуу классы, ашкана, китепкана, жыйындар залы, заманбап лабораториялар, 25 метрлик бассейн, спорт зал, эл аралык стандарттагы стадион, чуркоо жолу жана жашылдандыруу иштери да каралган.
Учурда имараттын курулуш иштери 75%га бүттү. Текшерүүнүн жыйынтыгында министр курулуштун сапатын жогорулатуу жана белгиленген мөөнөттөрдү так сактоо боюнча тиешелүү тапшырмаларды берди.
