Милициянын атын жамынып, жарандан 60 миң сом алган шектүү кармалды
Ички иликтөө кызматы өзүн Бишкектин Патрулдук милиция башкармалыгынын кызматкеримин деп тааныштырып, жаранды алдаган шектүүнү кармады. Бул тууралуу Ички иштер министрлигинин басма сөз кызматы билдирди.
Мекеменин маалыматына ылайык, К.У.С. аттуу жаран арыз менен кайрылып, белгисиз адам ишенимине кирип, андан 60 миң сом алып, автоунааны айып короодон чыгарып алууга укук берет деген жасалма документ тапшырганын билдирген.
Бул факты боюнча Кылмыш-жаза кодексинин "Алдамчылык" беренеси менен кылмыш иши козголгон.
Тергөө-ыкчам иш-чараларынын жүрүшүндө шектүү катары ИИМдин Ички иликтөө кызматынын кызматкерлери тарабынан мурда соттолгон, 1992-жылы туулган К.У.М. аттуу жаран кармалды.
Жашаган жеринде жүргүзүлгөн тинтүү учурунда Бишкек шаарынын Патрулдук милиция башкармалыгы тарабынан берилгендей жасалмаланган, айып короодон унааны чыгарууга укук берүүчү маалымкаттардын бланктары табылып, алынды.
Учурда укук коргоо органдары окуянын бардык жагдайларын тактап, кармалган жарандын башка кылмыштарга тиешеси бар же жок экенин аныктоо боюнча тергөө иштерин улантууда.
