Чүйдө 4,6 млн сомдук акциздик белгиси жок өндүрүмдөр табылды
Чүй облусунун Новопокровка айылында жүргүзүлгөн рейддин жүрүшүндө акциздик белгиси жок алкоголдук өндүрүмдөр жана күйүүчү-майлоочу майлар аныкталды.
Салык кызматынын маалыматына караганда, кампалардын биринен акциздик маркасы жок 436 даана алкоголдук ичимдик, ошондой эле жалпы көлөмү 13 миң 306 литр мотор майы табылган.
Алардын жалпы наркы 4 млн 617 миң 518 сомду түздү.
Бул факт боюнча тиешелүү актылар түзүлүп, укуктук баа берүү жана мыйзамга ылайык чара көрүү үчүн укук коргоо органдарына өткөрүлүп берилди.
Тактай кетсек, акциз — алкоголдук ичимдиктер, тамеки жана күйүүчү май сыяктуу айрым товарларга мамлекет тарабынан салынуучу кошумча салык.
