Көмүр казууга даярдык иштери 5 жылдагы эң жогорку натыйжаны көрсөттү
2026-жылдын I жарым жылдыгынын жыйынтыгы боюнча "Кыргызкөмүр" ААКсы көмүр алуу үчүн 5 млн 314,1 миң куб метр катмарды казып, даярдык көрдү. Бул көрсөткүч акыркы беш жылдагы эң жогорку деңгээл болуп, 2025-жылдын ушул мезгилине салыштырмалуу дээрлик 1,6 эсеге көп.
Ишканадан билдиришкендей, аткарылган иштер кара алтынды казып алуу үчүн алдын ала топурак жана таштарды тазалоо, өндүрүш аянттарын ачып берүү багытында жүргүзүлдү.
Бул көрсөткүч өндүрүштү туура пландаштыруунун, эмгекти натыйжалуу уюштуруунун, заманбап тоо-кен техникаларын колдонуунун жана инженердик-техникалык кызматкерлердин кесипкөйлүгүнүн натыйжасы экени белгиленди.
Даярдык иштеринин көлөмүнүн көбөйүшү көмүр казып алуунун туруктуулугун камсыздап, алдыдагы күз-кыш мезгилине карата энергетикалык ресурстарды үзгүлтүксүз жеткирүүгө шарт түзөт.
"Кыргызкөмүр" ААКсы жетишкен натыйжа өлкөнүн энергетикалык коопсуздугун камсыздоого багытталган маанилүү жыйынтык катары бааланууда.
