Ошто мыйзамсыз жер казган курулуш компаниясынын иши токтотулду
Ош шаарынын Фрунзе кичи районунда жаңы курулган жолдун бир бөлүгүн мыйзамсыз казган курулуш компаниясынын иши токтотулту. Бул тууралуу Ош шаардык мэриясы билдирди.
Мэриянын маалыматына ылайык, социалдык тармактарда тараган видео боюнча текшерүү жүргүзүлүп, "Ак Кайың" курулуш компаниясына уруксатсыз жер казуу иштери боюнча мыйзамга ылайык административдик айып пул салынды.
Ошондой эле чогултулган материалдарга укуктук баа берүү үчүн Ош шаардык прокуратурасына жана Улуттук коопсуздук мамлекеттик комитетинин Ош шаары боюнча башкармалыгына өткөрүлүп берилген.
Учурда мэриянын тиешелүү түзүмдөрү тарабынан аталган объекттеги бардык курулуш иштери толугу менен токтотулган.
Мэрия шаардагы коомдук пайдалануудагы жерлерди жана тургундардын кызыкчылыгын коргоо боюнча көзөмөл мындан ары да улантыларын белгиледи.
