Сокулуктагы асыл тукум станциясынын жабдуулары жаңыланды
Сокулук районунун Сарбан айылындагы “Элита” мамлекеттик асыл тукум станциясында суюк азот өндүрүүчү жабдуулар толугу менен жаңыланды. Бул тууралуу Ветеринардык кызматтан билдиришти.
Маалыматка ылайык, долбоор Кореянын КОРIA борбору менен биргеликте ишке ашырылган.
Жаңылоо иштеринин жыйынтыгында станциянын өндүрүштүк мүмкүнчүлүгү жогорулап, суюк азотту үзгүлтүксүз өндүрүү жана өлкө боюнча жасалма уруктандыруу кызматтарына жеткирүү шарттары жакшырды. Ошондой эле кызматкерлер үчүн заманбап жана коопсуз эмгек чөйрөсү түзүлдү.
Ветеринардык кызматтын маалыматына караганда, суюк азот асыл тукум букалардын уруктарын узак мөөнөткө сапатын жоготпой сактоого мүмкүндүк берет.
Белгилей кетсек, былтыр бул багытта республикалык казынадан 60 млн сом бөлүнүп, 200 миңден кем эмес уй жана кунаажынга жасалма уруктандыруу жүргүзүү каралган. Учурда фермерлер “Симментал”, “Швиц”, “Абердин-Ангус” жана “Голштино-Фриз” асыл тукум букаларынын уруктарын колдонуп келишет.
