Мурдагы эл өкүлү Кундузбек Сулайманов эркиндикке чыкты
Жогорку Кеңештин мурдагы депутаты Кундузбек Сулайманов 26-июнда эч жакка чыкпоо тууралуу тил кат менен бошотулду. Бул маалыматты Бишкек шаардык сотунун басма сөз кызматы ырастады.
Буга чейин, 1-апрелде Улуттук коопсуздук боюнча мамлекеттик комитет Кундузбек Сулайманов кармалганын билдирген.
Атайын кызматтын маалыматына ылайык, ал кызматтык ыйгарым укуктарынан пайдаланып, материалдык пайда алуу максатында жеке компаниянын кызыкчылыгына колдоо көрсөткөнү аныкталган.
Ошондой эле Юстиция министрлигине караштуу Соттук-эксперттик кызмат жүргүзгөн экспертизанын жыйынтыгында "НарынГЭС" ААКсы жана подряддык уюмдар аткарылган иштердин көлөмүн негизсиз көбөйтүү аркылуу мамлекетке өзгөчө ири өлчөмдө зыян келтиргени аныкталганы айтылган.
Кундузбек Сулайманов кармалганга чейин социалдык тармактарда "Камбар-Ата-1" ГЭСинин курулушуна байланыштуу делген видео тараган. Анда анын ысымы да аталган.
Кундузбек Сулайманов Жогорку Кеңештин VII жана VIII чакырылыштарынын депутаты болгон. Ал президент Садыр Жапаров УКМКнын мурдагы төрагасы Камчыбек Ташиевди кызматтан бошоткондон кийин депутаттык мандатын тапшырган.
