Ош шаарынын күнүнө карата 10 гүлзар ачылат
Ошто дагы 10 жаңы гүлзар курулуп, алар 5-октябрь – Ош шаарынын күнүнө карата пайдаланууга берилет.
Калаа мэриясынын маалыматына ылайык, буга чейин мэр Жанар Акаевдин демилгеси менен 10 жаңы гүлбакча ачылган. Эми дагы 10 гүлзар курула турган аймактар аныкталып, алар шаардын ар кайсы бөлүгүндө, буга чейин каралбай келген эски көп кабаттуу үйлөрдүн айланасына жайгаштырылат.
Жакынкы күндөрү баштала турган курулуш иштеринин алкагында гүлзарларга балдар аянтчалары орнотулуп, отургучтар коюлат, аймактар көрктөндүрүлүп жана жашылдандырылат.
Белгиленгендей, долбоордун негизги максаты – шаар тургундары үчүн ыңгайлуу, коопсуз жана жашыл эс алуу жайларын көбөйтүү, ошондой эле жашоо чөйрөсүнүн сапатын жакшыртуу.
