Өзгөндө жайыт жерге 51 миң сом зыян келтирилгени аныкталды
Жерди жана сууну көзөмөлдөө боюнча кызматтын Ош шаары жана Ош облусу боюнча аймактык башкармалыгы Өзгөн районунун Төрт-Көл айыл аймагында жайыт жерди мыйзамсыз пайдалануу фактысын аныктады.
Айыл чарба министрлигинин басма сөз кызматынын маалыматына ылайык, текшерүүнүн жүрүшүндө Жылалды айылынын Беш-Кепе тилкесинде З.Т. аттуу тургун болжол менен 100 чарчы метр жайыт жердин асылдуу катмарын өз алдынча сүрдүргөнү аныкталган.
Бул факты боюнча тиешелүү акт, жазма буйрук жана укук бузуу жөнүндө протокол түзүлдү. Жер мыйзамдарын бузууга байланыштуу чаралар көрүлүп, жаранга 3 000 сом айып пул салынды. Ал эми жайыт жердин асылдуу катмарына келтирилген зыян 51 миң 120 сом деп эсептелди.
Учурда бузулган жерди баштапкы абалына келтирүү милдети жерди бузган жаранга жана айыл өкмөтүнө жүктөлдү.
