Бажы кызматы 2,1 млн сомдук төлөмдү жашыруу аракетин аныктады
Мамлекеттик бажы кызматы Түркмөнстандан Кыргызстанга ташылып келген текстиль өндүрүмдөрүнүн бажы наркын жасалма түрдө төмөндөтүү фактысын аныктады.
Мекеменин маалыматына ылайык, "М.Т." ЖЧКсынын дарегине "Кант" бажылык тариздөө жайына салмагы 21,6 тоннадан ашкан өндүрүмдөр келген. Документтерди текшерүүдө реквизиттери бирдей, бирок товардын баасы ар башка көрсөтүлгөн эки эсеп-фактура табылган. Алардын биринде товардын баасы 11,5 миң доллар, экинчисинде 56,6 миң доллар деп көрсөтүлгөн.
Товардын чыныгы наркын тактоо үчүн Кыргызстандын бажы органдары Түркмөнстандын бажы кызматына суроо-талап жөнөткөн. Анын жыйынтыгында 56 миң 610 доллар деп көрсөтүлгөн баа туура экени ырасталган.
Кайра эсептөөнүн негизинде төлөнбөй калган бажы төлөмдөрү 2 млн 108 миң 794 сомду түзгөн. Бул каражат толугу менен мамлекеттик казынага өндүрүлүп, келтирилген зыяндын орду толтурулганы маалымдалды.
Топтолгон материалдарга юридикалык баа берүү үчүн Мамлекеттик бажы кызматынын Тергөө башкармалыгына өткөрүлүп берилди.
