Бир жумада 25 миңге жакын жол эрежесин бузуу фактысы аныкталды
Өлкө боюнча 29-июндан 4-июлга чейинки аралыкта жалпысынан 24 миң 985 жол эрежесин бузуу фактысы катталды. Бул тууралуу Жол кыймылынын коопсуздугун камсыздоо башкы башкармалыгы билдирди.
Мекеменин билдирүүсүндө эң көп катталган мыйзам бузуу түрлөрү төмөнкүлөр экени айтылды:
- Тийиштүү документтери жок транспорт каражатын башкаруу — 2 539 учур;
- Мас абалында унаа башкаруу — 362 учур;
- Автоунаа айнектерин мыйзамсыз караңгылатуу — 193 учур;
- Жөө жүргүнчүлөр тарабынан жол эрежелерин бузуу — 1 238 учур;
- Транспорт каражаттарын эксплуатациялоо эрежелерин бузуу — 4 502 учур;
- Автоээнбаштык — 52 учур;
- Ылдамдык чектөөсүн ашыруу — 2 135 учур;
- Жалган мамлекеттик номер менен унаа башкаруу — 6 учур;
- Башка түрдөгү мыйзам бузуу фактылары — 9 267 учур.
Ошондой эле аталган мезгил ичинде 4 691 унаа айып короо жайына убактылуу токтотулган.
Жол кыймылынын коопсуздугун камсыздоо башкы башкармалыгы айдоочуларды жана жөө жүргүнчүлөрдү жол кыймылынын эрежелерин так сактоого, бири-бирине сылык мамиле кылууга жана жол коопсуздугу боюнча мыйзам талаптарын толук аткарууга чакырды.
