Кадамжайда жапайы каманды мыйзамсыз аткан жаран 62,5 миң сом төлөйт
Кадамжай районунда жапайы каманды мыйзамсыз аткан жаран жоопкерчиликке тартылды. Бул тууралуу Жаратылыш ресурстары, экология жана техникалык көзөмөл министрлигинин басма сөз кызматы билдирди.
Аталган министрликтин Баткен регионалдык башкармалыгы жапайы жаныбарларды мыйзамсыз аңчылыктан коргоо боюнча өткөргөн кезектеги рейдинде С.К. аттуу жаран тиешелүү уруксат берүүчү документтери жок бир баш жапайы каманды атканын аныктаган.
Бул факты боюнча мыйзамга ылайык жаранга 12 миң 500 сом өлчөмүндө административдик айып пул салынып, жаратылышка келтирилген зыян үчүн 50 миң сом өлчөмүндө доо эсептелди. Жалпы өндүрүлө турган сумма 62 миң 500 сомду түзөт.
Министрлик жапайы жаныбарлар мамлекеттин өзгөчө коргоосундагы жаратылыш байлыгы экенин белгилеп, мыйзамсыз аңчылык биологиялык ар түрдүүлүккө жана экологиялык тең салмактуулукка олуттуу зыян келтирерин эскертти.
