Өзбекстан Кыргызстанга күйүүчү май сатууга макул болду
Өзбекстан Кыргызстанга күйүүчү-майлоочу май жеткирүүгө макулдук берди. Бул тууралуу энергетика министри Алтынбек Рысбеков 8-июлда журналисттерге билдирди.
Анын айтымында, Кыргызстан буга чейин күйүүчү май импорттоо боюнча Казакстан жана Өзбекстанга кайрылган. Казак тарап азырынча жооп бере элек.
Министр ошондой эле Иран жана Түркмөнстандын Кыргызстандагы элчилери менен да бул маселе боюнча сүйлөшүүлөр жүргүзүлгөнүн айтып, күйүүчү майдын жаңы жеткирүү булактарын табуу боюнча иштер улантылып жатканын белгиледи.
Энергетика министрлиги июнь айынын башында Орусия, Беларусь, Азербайжан, Казакстан, Өзбекстан, Түркмөнстан жана башка өлкөлөрдүн тиешелүү органдарына күйүүчү-майлоочу май жеткирүү боюнча суроо-талаптарды жөнөтүп, сүйлөшүүлөрдү баштаган.
Буга чейин Министрлер кабинетинин төрагасынын биринчи орун басары Данияр Амангелдиев Кытай менен Беларусь да Кыргызстанга күйүүчү май жеткирүүгө макул болуп, алгачкы келишимдердин негизинде жеткирүүлөр башталганын билдирген.
Акыркы айларда Орусиядагы мунай иштетүүчү заводдорго жасалган чабуулдардын кесепетинен күйүүчү май өндүрүү азайып, аймактагы рынокто бензин менен дизелдин тартыштыгы жаралган.
Расмий маалыматка ылайык, Кыргызстан жылына болжол менен 2 млн тонна күйүүчү-майлоочу май керектейт. Анын 95%га жакыны Орусиядан импорттолот.
