Акыйкатчы Караколдо майыптыгы бар адамдар үчүн шарт түзүүнү талап кылды
Акыйкатчы Жамиля Жаманбаева Ысык-Көл облусунун жергиликтүү бийлик органдарын майыптыгы бар адамдар үчүн жеткиликтүү шарттарды түзүүгө жана Караколдогу авариялык абалдагы турак үйдү оңдоп-түзөөгө чакырды.
Акыйкатчы институтунун маалыматына ылайык, мекеменин Ысык-Көл облусундагы өкүлчүлүгү Азиздер жана дүлөйлөр коомунун Караколдогу окуу-өндүрүштүк ишканасында байкоо жүргүзгөн.
Кызматкерлер жашаган эки кабаттуу, тогуз батирлүү үйдүн чатырынан жаан өткөнү, дубалдары көгөрүп кеткени аныкталган. Тургундар үйдү оңдоо өтүнүчү менен мэрияга бир нече жолу кайрылышканы менен маселе ушул күнгө чейин чечилбей жатканын билдиришкен.
Ошондой эле майыптыгы бар жарандар үн чыгаруучу жол чырак, жөө адамдар үчүн атайын эскертүү белгилеринин жана сурдокотормочулардын жоктугу мамлекеттик кызматтарды толук пайдаланууга тоскоол болуп жатканын айтышкан.
Жыйынтыгында акыйкатчы Ысык-Көл облусундагы президенттин ыйгарым укуктуу өкүлүнө аныкталган кемчиликтерди жоюу боюнча сунуштама жөнөткөн.
