Баткенде 1200дөн ашуун окуучу билим алган мектеп оңдолууда

Баткен районундагы Бото Нарматов атындагы инновациялык жалпы билим берүү мектеби толугу менен оңдолуп жатат.

Агартуу министрлигинин маалыматына ылайык, аталган окуу жай өлкө боюнча инновациялык макам алган 53 мектептин катарына кирет.

Учурда мектепте STEM кабинеттерин, спорт залды, китепкананы, мугалимдер бөлмөсүн, фойени жана санитардык түйүндөрдү оңдолууда. Ошондой эле имараттын сырты да жаңыланат.

Баткен райондук билим берүү бөлүмүнүн башчысы Олжобай Мажилимов мектепте 1200дөн ашуун окуучу билим аларын белгилеп, инновациялык мектеп макамы райондогу билим берүү системасын өнүктүрүүгө өбөлгө түзөрүн айтты.

Мектеп директору Рахманали Султанов оңдоп-түзөө иштери белгиленген мөөнөттө аяктап, жаңы окуу жылында окуучулар заманбап билим берүү мекемесинде окуусун улантарын билдирди.

Тактап кетсек, инновациялык мектеп — бул кадимки мектептен айырмаланып, билим берүүнүн жаңы ыкмаларын, заманбап технологияларды жана окутуунун жаңы багыттарын колдонууга багытталган билим берүү мекемеси.