Бишкек мэриясы тургундарды экологиялык кеңештин ачык жыйынына чакырды
Бишкек шаардык мэриясы калааны жашылдандыруу маселелерине арналган экологиялык кеңештин жыйыны өтөрүн билдирди.
Иш-чара 10-июлда саат 17:00дө "Бишкек жашыл курулуш" муниципалдык ишканасынын питомнигинде өтөт. Жыйынга шаар мэри Айбек Жунушалиев төрагалык кылат.
Жолугушууда шаарды жашылдандыруу, экологиялык көйгөйлөр жана бул багыттагы сунуштар талкууланат. Жыйын ачык форматта өтүп, ага ыктыярчылар, экологиялык уюмдардын өкүлдөрү, ЖМК өкүлдөрү жана блогерлер чакырылууда.
Ошондой эле каалоочулар үчүн шаардагы көйгөйлүү аймактарды кыдыруу уюштурулат. Катышуучулар саат 16:00дө Бишкек мэриясынын имаратынын алдына чогулушат.
Иш-чарага катышууну каалагандар 9-июлда саат 13:00гө чейин каттоодон өтүшү керек.
