Кочкор-Атадагы ишкер жаңгак, мисте жана кара өрүктү экспорттоону көздөөдө
Жалал-Абад облусунун Кочкор-Ата шаарында айыл чарба өндүрүмүн сактоо жана экспорттоо мүмкүнчүлүгүн кеңейтүүгө багытталган демилге ишке ашырылууда. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Жеке ишкер Акылбек Кадыркулов жаңгак, мисте жана кара өрүк даярдоо менен алектенип, келечекте өндүрүмүн Орусия жана Түркия базарларына чыгарууну максат кылат.
Бул үчүн ишкер "Климаттын өзгөрүшүнө туруктуу айыл чарба кошумча нарк чынжырларын өнүктүрүү" долбоорунун алкагында жеңилдетилген каржылоодон пайдаланууну көздөөдө. Долбоордо айыл чарба азыгын сактоочу заманбап муздаткыч кампа куруу жана керектүү жабдууларды алуу каралган.
Учурда долбоордун адистери ишкерге бизнес-план даярдоо, кампаны уюштуруу, жабдууларды тандоо жана продукцияны сактоо боюнча кеңештерди берип жатышат.
Ошондой эле ишкер башка ийгиликтүү долбоорлор менен таанышып, тажрыйба алмашуу сапарына катышты.
Аталган долбоор айыл чарба өндүрүшүн өнүктүрүүгө жана жергиликтүү өндүрүмдөрдүн экспорттук мүмкүнчүлүктөрүн кеңейтүүгө багытталган.
