Кызыл-Кыяда күнүнө 70 тоннага чейин курулуш жабдууларын чыгаруучу ишкана ишке кирет

Баткен облусунун Кызыл-Кыя шаарында курулуш материалдарын чыгарган жаңы ишкана Эгемендүүлүк күнүнө карата ишке кирет. Бул тууралуу президенттин Баткен облусундагы өкүлчүлүгү билдирди.

Маалыматка ылайык, "Асыл Холдинг" жоопкерчилиги чектелген коому үчүн шаардык мэрия тарабынан 0,4 гектар жер аянты өндүрүштүк имараты менен кошо ижарага берилген.

Долбоорго жеке инвестор тарабынан 13,1 млн сом каражат тартылып, керектүү жабдуулар орнотулган. Учурда ишкана сыноо иретинде алгачкы өндүрүмдөрүн чыгарып жатат.

Ишкана толук кубаттуулукта ишке кирсе, күнүнө 60-70 тонна курулуш материалдарын чыгаруу жана 15 жаңы жумуш ордун түзүү мерчемделген.