Ошто жапайы кара куурайлар жок кылынып, түшүндүрүү иштери жүргүзүлдү
Ош шаарында синтетикалык баңгизаттарды жайылтуунун алдын алуу жана жапайы кара куурайларды жок кылуу боюнча иш-чаралар өттү. Бул тууралуу калаа мэриясы билдирди.
Маалыматка ылайык, Жапалак, Кызыл-Кыштак айылдык аймактык башкармалыктарында жана Манас-Ата кичи районунда жергиликтүү тургундар, айыл башчылар жана укук коргоо органдарынын өкүлдөрү катышкан рейддер уюштурулду.
Анын жүрүшүндө жапайы өскөн кара куурайлар орулуп, жок кылынды. Ошондой эле тургундарга интернет жана социалдык тармактар аркылуу баңгизаттарды жайылтуу коркунучу боюнча түшүндүрүү иштери жүргүзүлдү.
Мэрия жарандарды шектүү баракчаларга жана "оңой акча табууну" сунуштаган жарыяларга ишенбөөгө чакырып, баңгизаттарды мыйзамсыз даярдоо, сактоо, ташуу жана сатуу жоопкерчиликке алып келерин эскертти.
с
