Раззаковго багыт алган учак техникалык мүчүлүштүктөн улам кайра Бишкекке конду
9-июлда "Асман Эйрлайнс" авиакомпаниясынын Бишкектен Раззаков шаарына багыт алган учагы техникалык мүчүлүштүктөн улам "Манас" эл аралык аэропортуна кайра конду.
"Кыргызстан аэропорттору" ААКнын маалыматына ылайык, учуу маалында экипаж техникалык көйгөй тууралуу эскертүү индикатору күйгөнүн байкаган. Коопсуздук максатында учкучтар көрсөтмөгө ылайык учакты Бишкекке кайтаруу чечимин кабыл алышкан.
Маалыматка караганда, экипаж жана жердеги кызматкерлер бардык аракеттерди тиешелүү нускамага ылайык жүргүзүп, учак аэропортко кадимки тартипте конгон.
"Жүргүнчүлөрдүн жана экипаждын коопсуздугу — авиакомпаниянын башкы артыкчылыгы. Asman Airlines түшүнүү менен мамиле кылган жүргүнчүлөргө ыраазычылык билдирип, жаралган ыңгайсыздык үчүн кечирим сурайт", — деп айтылат маалыматта.
Буга чейин 7-июлда "Тез Жет" авиакомпаниясынын Бишкек–Ош каттамындагы учагы учуп көтөрүлүү маалында кырсыкка кабылган. Борттогу 181 жүргүнчү жана экипаждын 6 мүчөсү коопсуз жайга чыгарылган. Окуя боюнча иликтөө иштери жүрүп жатат.
