Социалдык тармактагы сындан кийин Аламүдүн суусу тазаланып жатат
Аламүдүн суусунун таштандыларга жана желим бөтөлкөлөргө толуп калганы тууралуу социалдык тармактарда тараган маалыматтан кийин тиешелүү кызматтар тарабынан ыкчам чаралар көрүлдү. Бул тууралуу Жаратылыш ресурстары, экология жана техникалык көзөмөл министрлиги билдирди.
Учурда Ленин айылындагы аймакта Экологиялык жана техникалык көзөмөл кызматынын, Чүй облустук ички иштер башкармалыгынын жана Достук айыл өкмөтүнө караштуу муниципалдык ишкананын өкүлдөрү биргеликте тазалоо иштерин жүргүзүп жатышат.
Текшерүүдө Аламүдүн суусунда суунун деңгээли көтөрүлгөндүктөн, жарандар тарабынан мыйзамсыз ыргытылган тиричилик таштандылары агын суу аркылуу келип, жээктерге топтолгону аныкталган.
Ошондой эле адистер жергиликтүү тургундарга таштандыларды белгиленген жайларга чыгаруу жана айлана-чөйрөнү таза сактоо боюнча түшүндүрүү иштерин жүргүзүүдө.
