Ак-Талаада экологиялык мыйзамдарды бузган 4 жаран аныкталды
Ак-Талаа районунда жүргүзүлгөн рейд учурунда уруксат кагазы жок аңчылык куралын колдонуп жүргөн жаран аныкталды. Бул тууралуу Жаратылыш ресурстары, экология жана техникалык көзөмөл министрлиги билдирди.
Нарын регионалдык башкармалыгынын маалыматына ылайык, Жылаңач жайлоосунан аңчылык куралын мыйзамсыз колдонуп жүргөн Кеңеш айылынын тургуну М.А.К. кармалган.
Алынган курал Ак-Талаа райондук ички иштер бөлүмүнө өткөрүлүп берилип, учурда тиешелүү текшерүү иштери жүргүзүлүүдө.
Ошондой эле Арпа суусунан балык уулоонун эрежелерин сактабаган жана тиешелүү уруксат кагазы жок үч жаран аныкталган. Аларга Укук бузуулар жөнүндө кодекске ылайык ар бирине 1000 сомдон, жалпы 3000 сом өлчөмүндө айып пул салынган.
Министрлик жарандарды жаратылышты коргоого, экологиялык мыйзамдардын талаптарын сактоого чакырып, мыйзам бузууларды аныктоо боюнча рейддик иш-чаралар мындан ары да улантыларын билдирди.
