Бишкекте этке үстөк акы кошпой сата турган 10 көчмө соода унаасы ишке кирет
Бишкекте калкка жеткиликтүү баада эт сатуу үчүн заманбап көчмө фудтрактарды ишке киргизүү долбоору башталды. Бул тууралуу Суу ресурстары, айыл чарба жана кайра иштетүү өнөр жайы министрлигинин басма сөз кызматы маалымдады.
Маалыматка ылайык, фудтрактар "Кыргыз Агрохолдинг" тарабынан даярдалып, калаа мэриясы менен биргеликте шаардын бардык райондоруна жайгаштырылат. Сыноо иретинде 10 көчмө соода түйүнү ишке киргизилип, келечекте алардын саны көбөйөт.
Министр Эрлист Акунбековдун айтымында, долбоор республикалык казынадан эмес, мамлекеттик ишкананын өз каражаттарынын эсебинен ишке ашырылды.
Фудтрактарда эт соода үстөк акысы кошулбастан сатылат. Учурда 1 кг эттин баасы 680 сом деп белгиленген. Социалдык багытты сактоо үчүн бир адамга 5 кгдан ашык эт сатылбайт.
Мэрия учурда фудтрак орнотуу үчүн 12 орун даярдалганын жана кошумча орундарды табууга даяр экенин билдирди.
