Бишкектин айрым аймактарында убактылуу суу берилбейт
10-июлда саат 09:00 чамасында ХБО суу топтомосунда электр тармагына байланыштуу өзгөчө кырдаал катталды. Бул тууралуу "Бишкексууканал" муниципалдык ишканасы маалымдады.
Кырдаалга байланыштуу борбор калаанын айрым райондорунда суу берүү убактылуу чектелди. Суу жок болгон аймактар төмөнкү көчөлөр менен чектелген:
Чыгыш ЧЧК – Анкара көчөсү – Кыдыр-Аке көчөсү – Оберон көчөсү – Лев Толстой көчөсү – Аламүдүн суусу – М. Горький көчөсү – 7-апрель көчөсү – Чыгыш ЧЧК.
Учурда адистер авариянын себептерин аныктап, кесепеттерин жоюу иштерин жүргүзүүдө. Оңдоо иштери жүрүп жаткан учурда суу топтомосунун электр энергиясы толугу менен өчүрүлөт. Насостук жабдуулар электр энергиясы менен иштегендиктен, бул аралыкта суу берүү мүмкүн болбой турганы айтылды.
"Бишкексууканал" тургундарга ичүүчү сууну ташып жеткиришет.
Ишкана калыбына келтирүү иштеринин жүрүшү тууралуу кошумча маалыматтар берилерин айтып, жарандардан убактылуу ыңгайсыздыктарга түшүнүү менен мамиле кылууну өтүндү.
