Эл аралык издөөдө 12 жылдан бери жүргөн оор кылмышка шектүү кармалды
Ички иштер министрлиги Түркиянын укук коргоо органдары менен биргеликте жүргүзгөн операциянын жыйынтыгында 12 жылдан бери издөөдө жүргөн жаран кармалып, Кыргызстанга жеткирилди.
ИИМдин маалыматына ылайык, Стамбул шаарында 1990-жылы туулган А.Ш. аттуу жаран кармалган. Ал Кыргыз Республикасынын Кылмыш-жаза кодексинин 97-беренесинде каралган (алдын ала сүйлөшүп алган адамдар тобу тарабынан адам өлтүрүү) өзгөчө оор кылмышка айыпталууда.
Тергөө маалыматтарына караганда, 2014-жылы февралда Бишкек–Ош унаа жолунда чыккан жаңжал учурунда такси айдоочусу М.У. каза болгон. Кылмыш жасалгандан кийин А.Ш. өлкөдөн чыгып кетип, Интерпол аркылуу эл аралык издөөгө жарыяланган.
ИИМ белгилегендей, шектүүнү кармоо Кыргызстандын жана Түркиянын укук коргоо органдарынын тыгыз кызматташтыгынын, эл аралык маалымат алмашуу механизмдеринин жана заманбап технологиялардын жардамы менен ишке ашкан.
Министрликтин маалыматына ылайык, акыркы жылдары чет мамлекеттерде жашырынып жүргөн, эл аралык издөөгө алынган бир катар адамдар кармалып, Кыргызстанга өткөрүлүп берилген.
ИИМ кылмыш жоопкерчилигинен качып жүргөн адамдарды аныктоо жана кармоо боюнча иштер мындан ары да улантыларын белгиледи.
